Өнөөдөр /2022.03.17/ Нийслэлийн Чингэлтэй дүүргийн Иргэдийн Төлөөлөгчдийн Хурлын Ажлын алба, дүүргийн Гэр бүл, хүүхэд, залуучуудын хөгжлийн хэлтэстэй хамтран Төлөөлөгчдийг цаг үеийн мэдээ, мэдээллээр хангах ажлын хүрээнд Гэр бүл, хүүхэд, залуучуудын хөгжлийн хэлтэс болон хүчирхийллийн гэрч, хохирогчдод үйлчилгээ үзүүлэх нэг цэгийн үйлчилгээний төвийн үйл ажиллагаатай танилцаж, цаашид хэрэгжүүлэх үйл ажиллагааны талаар санал солилцох зорилгоор “МЭДЭЭЛЛИЙН ЦАГ” арга хэмжээг зохион байгууллаа.

          Тус арга хэмжээний хүрээнд дүүргийн ИТХ-ын Төлөөлөгчид Гэр бүл, хүүхэд, залуучуудын хөгжлийн хэлтсийн үйл ажиллагаа, цаашдын зорилттой танилцлаа. Уг хэлтэс нь дүүргийн Засаг даргын 2013 оны 12 дугаар сарын 04-ний өдрийн А/332 тоот захирамжаар “Хүүхэд гэр бүл хөгжлийн төв” нэртэйгээр үүсгэн байгуулагдаж улмаар 2016 оны 11 дүгээр сарын 23-нд “Нийслэлийн Чингэлтэй дүүргийн Гэр бүл, хүүхэд, залуучуудын хөгжлийн хэлтэс” болсон бөгөөд Хөдөлмөр нийгмийн хамгааллын яам, Нийслэлийн Гэр бүл, хүүхэд, залуучуудын хөгжлийн газрын  харьяа Чингэлтэй дүүргийн Засаг даргын дэргэдэх төрийн үйлчилгээний байгууллага юм.

           Мөн хүчирхийллийн гэрч, хохирогчдод үйлчилгээ үзүүлэх нэг цэгийн үйлчилгээний үйл ажиллагаа, орчин нөхцөлтэй танилцан, цаашид авч хэрэгжүүлэх арга хэмжээ, боломж бололцооны талаар хэлэлцэн санал солилцлоо. Нэг цэгийн үйлчилгээний төв нь хүчирхийлэлд өртсөн охид, эмэгтэйчүүд, иргэдэд шаардлагатай эрүүл мэнд, нөхөн сэргээх, сэтгэл зүйн, нийгмийн, хууль хяналтын үйлчилгээг үзүүлэх, гэр бүлийн хүчирхийллийн шинжтэй гэмт хэргийн тоог багасгах зорилготой үйл ажиллагаа явуулж байна.

           Улмаар Гэр бүл, хүүхэд, залуучуудын хөгжлийн хэлтсийн дэргэдэх “Бүтээлч эмэгтэйчүүдийн клуб”-ын гишүүдтэй уулзалт зохион байгууллаа. Клубын үйл ажиллагааны чиглэл нь дүүргийн 0-5 насны хүүхэдтэй ээжүүдийг дэмжих, цагийн ажилд холбон зуучлах бөгөөд 7 хоног тутам ээжүүдийг чөлөөт цагаа зөв боловсон өнгөрүүлэхэд нь дэмжлэг үзүүлж спорт заалаар үнэ төлбөргүй үйлчилж байна.

ХУРЛЫН АЖЛЫН АЛБА